O‘zbekistonda import dori vositalarini faqat rasmiy import qiluvchilar va ularning dilerlari sotishi mumkin bo‘ladi

O‘zbekistonda 1-sentyabrdan farmatsevtika kompaniyalari va dorixonalarga litsenziya berishda qo‘shimcha talablar paydo bo‘ladi, deyiladi prezidentning 23-maydagi qarorida.

Qonunchilikka ko‘ra, farmatsevtika faoliyatini yoki dori vositalarini chakana realizatsiya qilish faoliyatini boshlash uchun bir qator shartlarni bajarish talab etiladi. Xususan:

• binolarni (farmatsevtika faoliyati amalga oshiriladigan) ijaraga olish yoki tekin foydalanish bo‘yicha barcha shartnomalar soliq organida majburiy tartibda ro‘yxatdan o‘tkazilishi kerak;
• dori vositalarini sotishda karta va boshqa elektron to‘lov vositalari orqali to‘lash imkoniyati.

Agar soliq tekshiruvi davomida kompaniya kontrafakt (kirim hujjatlarisiz) dori vositalarini yoki raqamli markirovkasi bo‘lmagan dori vositalarini sotib olayotgani, tashiyotgani, saqlayotgani yoki sotayotgani aniqlansa, litsenziya to‘xtatib turilishi mumkin.

1-iyuldan boshlab O‘zbekistonga olib kirilgan dori vositalarini ulgurji va chakana sotuvchilarga faqat import qiluvchi tashkilot yoki uning rasmiy dilerlari orqali va elektron hisobvaraq-faktura asosida sotishga ruxsat berish tartibi kuchga kiradi. Ya’ni import dori vositalarini faqat o‘zlari olib kirgan kompaniyalar yoki ularning rasmiy dilerlari sotishi mumkin bo‘ladi. Mustaqil vositachilar va vakolatli bo‘lmagan tashkilotlar bunday dori vositalarini qonuniy ravishda sotolmaydi.

Avvalroq O‘zbekistonda “mahalliy ishlab chiqaruvchilarni himoya qilish uchun” dori-darmonlarga bojlar oshirilishi haqida xabar berilgan edi. Avvalroq prezident mahalliy ishlab chiqarish bint, spirt va analgin ishlab chiqarishdan nariga o‘tmasligini ta’kidlagan edi.