O‘zbekistonliklarni salqin va uzoq dam olish kunlari kutmoqda

6–7-iyun kunlari respublika hududiga nisbatan salqin va nam havo massasi tarqala boshlaydi, deb xabar bermoqda O‘zgidromet matbuot xizmati.

5-iyun kuni kunduz kuni O‘zbekiston hududi bo‘yicha quruq va issiq ob-havo saqlanib turadi. Faqat Qoraqalpog‘istonda ba’zi joylarda qisqa muddatli yomg‘ir yog‘ishi, momaqaldiroq bo‘lishi mumkin. Havo harorati 36-39° atrofida, janubda va cho‘l hududlarda 40-42° gacha bo‘ladi.

6-iyunda Qoraqalpog‘istonda, Xorazm, Buxoro, Navoiy, Samarqand, Qashqadaryo viloyatlarida, 7 iyunda Toshkent, Surxondaryo viloyatlarida va Farg‘ona vodiysi viloyatlarida ba’zi joylarda qisqa muddatli yomg‘ir yog‘ishi, momaqaldiroq bo‘lishi mumkin.

Havo harorati asta-sekin pasayishi kutilmoqda. Shimolda, janubda va cho‘l hududlarda 6-iyunda, markaziy va sharqiy hududlarda 7-iyunda harorat 28-33° gacha, yomg‘ir yog‘ganda 25-27° gacha pasayadi. 8-iyun kuni O‘zbekistonning barcha hududlarida yog‘ingarchilik kutilmaydi va harorat 2-3 darajaga ko‘tariladi.

Respublika bo‘yicha ba’zi joylarda shamol tezligi 13-18 m/s gacha kuchayishi, ayrim joylarda chang-to‘zonlar bilan kuzatilishi kutilmoqda. 5-6 iyunda ba’zi joylarda shamol tezligi 20-22 m/s gacha kuchayishi mumkin. Tog‘larda vaqti-vaqti bilan yomg‘ir yog‘adi, 7 iyunda yomg‘ir yog‘adi, ba’zi joylarda kuchli bo‘ladi.

Toshkentda: 5-iyun kuni kunduzi kam bulutli, yog‘ingarchiliksiz bo‘ladi. Harorat 36-38 darajani tashkil etadi. 6-iyun kuni o‘zgaruvchan bulutli, yog‘ingarchiliksiz. Shamolning 13-18 m/s gacha kuchayishi mumkin. Harorat taxminan 33 daraja atrofida bo‘ladi. 7-iyunda qisqa muddatli yomg‘ir, momaqaldiroq ehtimoli bor. Harorat 27-29 daraja. 8-iyun kuni yog‘ingarchiliksiz. Harorat 33-35 darajaga yetadi.